فى خوازيق وزنب وصدمات كتير أوى أخدناها من أول الثورة دى لكن أكبر خازوق وصدمة أخدناهم وأخدتهم البلد كلها كان خازوق وصدمة "الجيش" لا مش حكاية إن جيشنا أضعف من فرق الكشافة ولا أنه ما يقدرش يصمد فى مواجهة مسلحة مع جيش جزر القمر -ده لو عندهم جيش أصلا- وإن الفساد والترهل فيه أكتر من اللى فى مصر كليها مليون مرة (ياريت بس الأمامير بتوع وحيد بابا وماما وقيد العائلة والغعفاء الطبى والأمنى وتأجيل 3 سنين يركنوا على جنب دلوقتى علشان مش وقتهم ومش طالباهم, وبرده ياريت الكتاكيت بتوع "طلائع النصر" و "الطريق إلى إيلات" وخير أجناد الأرض برده يركنوا على جنب دلوقتى علشان برده مش وقتهم ومش طالباهم خالص) الخازوق والصدمة كان فى موقف الجيش المعادى للثورة وأشتراكه فى قتل وسحل وتعرية الثوار بشكل أبشع من اللى عملته الشرطة فى بدايات الثورة الجيش اللى قاعدين بقالنا أكتر من 40 سنة بنصرف عليه من قوتنا مرتبات ومنح وحوافز ومصايف وفنادق وإمتيازات وجيه فى الآخر يقتلنا فى الشوارع ويعرى بناتنا وينتهك أعراضهم فى السجون الحربية.........ده أحنا لو كنا بنربى كلب كان زمانه طمر فيه الجيش اللى لما نزل فى بداية الثورة ولقى القوة مع الشارع والميدان والشعب إنحاز ليهم وقال مش حضرب نار ولما الليلة أنفضت والثوار بقوا أقلية وتخلى الشعب عنهم والمجلس العسكرى بقى هو اللى أقوى قال حضرب وأقتل وأسحل وأسجن ياريت بس ماحدش يقول إزاى بتقول كده ومش عارف أيه, ياريت تفتكروا الكلام ده بس:  ttps://www.facebook.com/photo.php?fbid=2766906645832&set=a.1532632589752.70191.1052908980&type=3
الجيش اللى طلع للأسف أوطى من كل الجيوش العربية اللى بتقمع أو حاولت تقمع ثورات شعوبها دلوقتى الجيش اللى طلع أوطى حتى من الجيش السورى على الرغم من كل مجازره اللى بيعملها ضد أخوانا فى سوريا وقبل ماحد يتشنج ويقولى إزاى؟؟؟؟ شوف الجيش السورى بيعمل أيه, تعالوا كده نحسبها بالعقل الجيش السورى فعلا بيرتكب مجازر بشعة لسه جيشنا ما وصلش لمرحلة أنه يعملها فى مصر, لكن فى المقابل فى شرفاء كتير جدا فيه أنشقوا ووقفوا بسلاحهم الشخصى ضد آلة القتل العسكرية التابعة للكلب "بشار" شوفنا ظباط وعساكر كتير كانوا بينشقوا واحد واحد أو أتنين أتنين ويدافعوا عن أهلهم من المدنيين ويُستشهدوا فى سبيل ده شوفنا بطولات أسطورية منهم فى حمص وبابا عمرو شهد بيها ليهم الغرب نفسه والمراسلين الأجانب عن أفراد الجيش الحر اللى بيحاولوا يعملوا ممرات آمنة لشعبهم فى وسط القذف لتوفير الماء والغذاء ليهم وإجلائهم وبيموتوا فى سبيل ده بطولات حتفضل سوريا للأبد تتغنى وتفتخر بيها بعد النصر بإذن الله على الكلب "بشار" وزبانيته دول ناسى لا قالوا معلش أصل الشرطة العسكرية مضيقة علينا ولا المخابرات الحربية بتراقبنا ولا الامن الحربى ما بيرحمش دول فعلا جنود سوريا وشعبها اللى بيبروا بقسمهم بالموت فى سبيلها وسبيل شعبها مش جنود "بشار" أو أبوه دول ما فضلوش الحافز والمنحة والقرض على بلدهم وشعبهم دول كانوا مع الثورة قلبا وقالبا مش كلام وبس من على النت دول ناس قالوا أحنا مستعدين نموت فدى تراب بلدنا وشعبنا وفعلا ربنا نولها ليهم, لأنهم كانوا رجالة وفعلا حبهم لبلدهم أكتر من حبهم لنفسهم أو أهلهم أو مناصبهم ربنا ينصرهم ويثبتهم ويحفظهم ويحرر بيهم سوريا إن شاء الله أحنا بقى البشوات عندنا مع الثورة "بُقيقى" وخلاص, أصل "طنطاوى" مفترى, أصل المخابرات الحربية مفترية, أصل التحريات العسكرية مفترية, أصل الشرطة العسكرية مفترية, أصل......أصل......أصل........ وحتى الرجالة اللى فيهم اللى نزلوا قبل كده, نزلوا مظاهرة فى الميدان من غير سلاح (إستمرار لهطل "السلمية" اللى الثورة غرقانة فيه) وكأنهم زيهم زينا أحنا المدنيين واللى يغيظ أكتر إن اللى نزلوا فى أحداث "محمد محمود" (الرائد "تامر بدر" والنقيب " عمرو المتولى) علشان يدافعوا عن المتظاهرين وهم عارفين إنهم كده كده حيتقبض عليهم برده نزلوا يدافعوا بالطرق السلمية اللى تنقط دى (أعتقد إن ده اكبر دليل على عدم وجود عقيدة القتال عند أفراد جيشنا وإن المخلوع ونظامه نجحوا أنهم يقتلوها فيهم) ومن بعدهم قاعدين نسمع عن ظباط الجيش الشرفاء اللى مع الثورة بس مش قادرين انهم يعملوا حاجة لا يتقبض عليهم (يا أخى.........) ماشى مش قادرين تبقوا زى رجالة سوريا وخايفين من المواجهة المباشرة مش مشكلة فى طرق تانية كتير للشغل الحقيقى على الأرض فى أحد التصريحات المنتشرة على الفيس بوك والمنسوبة-الله أعلم بصحته- للنقيب "محمد طارق الوديع" من داخل سجنه الحربى بيهدد ويتوعد "طنطاوى" وبقية أعضاء المجلس العسكرى بتعقبهم وقتلهم عند خروجه من السجن نتيجة تعمد أهانته هو وبقية ظباط 8 أبريل وبيقولهم بالنص: (أفتكروا أنى كنت قائد فرقة إغتيالات) التصريح ده مش حيفرق إذا كان صحيح ولا متفبرك لكنه فكرنى بحاجة مهمة جدا وصفحة مضيئة من صفحات النضال المصرى على أيد أشخاص عسكريين وغير عسكريين حضراتكم سمعتوا عن "تنظيم ثورة مصر"؟؟؟؟؟؟؟؟؟؟؟؟؟؟؟ سمعتوا عن بطل المخابرات العامة المصرية -الله يرحمها بقى ويرحمه- "محمود نور الدين"؟؟؟؟؟؟؟؟؟؟؟؟؟؟؟؟ لو ما سمعتوش تقدروا تشوفوا الفيدو ده: http://www.youtube.com/watch?v=DDFExbT8WnI لو ما سمعتوش تقدروا تقرأوا التقرير ده: http://ar.wikipedia.org/wiki/%D9%85%D8%AD%D9%85%D9%88%D8%AF_%D9%86%D9%88%D8%B1_%D8%A7%D9%84%D8%AF%D9%8A%D9%86 ده يا سادة كان ظابط مخابرات محترم قدر أنه ينفذ عمليات الإغتيال دى كلها فى مصر ضد ظباط الموساد الأسرائيلى والمخابرات المركزية الأمريكية العاملين فى السفارتين الاسرائيلية والأمريكية فى مصر كظباط أمن ورغم ده لا المخابرات العامة ولا المخابرات الحربية المصريتين ولا الموساد الأسرائيلى ولا السى أى أيه الأمريكية قدروا يوصلوا ليه هو وبقية أفراد تنظيمه اللى ضم أفراد محترمين ومن النخبة والصفوة زى المهندس "خالد جمال عبد الناصر" إبن الرئيس الراحل "جمال عبد الناصر" و "د. شريف حسين محمود الشافعى" إبن السيد "حسين الشافعى" عضو مجلس قيادة ثورة يوليو ونائب رئيس الجمهورية السابق ولولا الخيانة ما كانوش قدروا يقبضوا عليهم ودول برده ما قالوش المخابرات العامة مفترية وتعرف دبة النملة وما قالوش ده الموساد والسى آى أيه يقدروا يعرفونا ويجيبونا من آخر الدنيا دول ناس حبوا مصر وأشتغلوا عنها وما خافوش لا من الموت ولا من السجن ألف مليون تحية لأعضاء "تنظيم ثورة مصر" العسكريين والمدنيين اللى حبوا البلد أكتر من حبهم لنفسهم ولأهلهم ولمناصبهم وألف مليون تحية برده لأبطال سوريا أسود الجيش الحر اللى حبوا بلدهم وشعبهم اكتر من حبهم لنفسهم ولأهلهم ولمناصبهم وألف مليون أتفووووووووووووو على الجيش اللى بيقتل اهله ويسحل ويعرى بناته ويبيع بلده علشان خاطر زيادة مرتب أو حافز أو قرض أو خايف من السجن أو القتل الشعوب خيبتها فى جيوشها السبت والحد, وأحنا خيبتنا فى جيشنا ماورديتش على حد === مقولة رائعة لعلكم تفهمون ما هي الوطنية يا ضباط جيش مبارك وطنطاوي -- (أنا جندى, أخدم بلدى....لكن هذه ليست بلدى......كنت مستلقى هناك أنزف حتى الموت, أفكر.... إذا مت الآن فلن أترك شيئا لأولادى سوى العار, الآن أعرف أن هناك طريقة واحدة فقط لخدمة ألمانيا....إذا فعلت هذا سأكون خائنا.........أقبل ذلك) كولونيل/ كلاوس فون ستافنبيرج مُخطط عملية "فالكيرى" لإغتيال "أدولف هتلر"